Cymwysterau yng Nghymru

Mae'r ffordd y mae Llywodraeth Cymru yn adrodd ar wybodaeth am gymwysterau yn newid i gefnogi dysgu 14-16 o dan y Cwricwlwm i Gymru. Ym mis Ionawr, cynhaliwyd ymgynghoriad gan Lywodraeth Cymru ynghylch ei dull cyffredinol o ddefnyddio data a gwybodaeth yn y system ysgolion ac ar Fframwaith Dangosyddion yr Hawl i Ddysgu 14 i 16 arfaethedig. Daeth yr ymgynghoriad i ben ar 14 Mawrth 2025 ond gellir cael gafael arno o hyd yma (ar gyfer y rhai sy'n gweithio gyda'r system ysgolion) ac yma (i'r cyhoedd yn gyffredinol). Bydd crynodeb o’r ymatebion yn cael ei gyhoeddi yn ystod haf 2025.

Gan na fydd canlyniadau cymwysterau yn cael eu trosi'n sgoriau ar ffurf pwyntiau fel rhan o'r trefniadau hyn yn y dyfodol, mae'r 'Gwybodaeth Perfformiad' ar y dudalen hon ac yn y dogfennau Cymwysterau yng Nghymru y gellir eu hallforio bellach ar gael ar gyfer y blynyddoedd adrodd hyd at y flwyddyn 2026 yn unig. Ar ôl hyn, ni fydd y botwm 'Gwybodaeth Perfformiad a Cwricwlwm Llywodraeth Cymru' a'r wybodaeth gysylltiedig yn y dogfennau y gellir eu hallforio ar gael mwyach, wrth i ni symud i weithredu'r trefniadau adrodd newydd. Fodd bynnag, bydd gwybodaeth hanesyddol ar gael i'w hallforio ar wahân at ddibenion archwilio. Dylid anfon unrhyw gwestiynau at ims@llyw.cymru.